Kryeministri Edi Rama ishte sot në një takim me Komitetin Olimpik Shqiptar, kryetarët e bashkive dhe drejtuesit e arsimit.
Gjatë fjalës së tij, Rama iu bëri thirrje kryetarëve të bashkive që të investojë dhe fokusohen te sporti për fëmijët, të rinjtë dhe nxënësit e shkollave apo komunitetin
Ai gjithashtu nuk i kurseu kritikat në lidhje me financimet që bashkitë bëjnë për klubet private sportive.
“Na duhet një rishikim nga ana juaj si bashki i qasjes me fondet e sportit. Janë bërë disa hapa disi detyrues ndaj bashkive, por bashkitë në përgjithësi vazhdojnë të hedhin kot lekë për futbollin. Harxhojnë lekët e taksapaguesve kot, për ekipe private pa asnjë arsye në botë. Nuk e bën asnjë bashki e planetit këtë. Lekë me humbje që nuk kanë asnjë vlerë. Duhet ndërtuar një qasje tjetër. E kemi thënë shumë herë. Me të ardhurat nga taksat jeni të gjithë në të drejtën e Zotit, dhe në detyrimin e qytetarëve të financoni sportin për të gjithë, sportin jo profesionist. Të financoni sportin për fëmijët. Të financoni sportin për të rejat dhe të rinjtë. Jo të financoni skuadra futbolli pronarësh privatë ku ju vetëm hidhni lekë dhe nuk merrni mbrapa asgjë përveç shpërfytyrimit, turpit të sportit edhe bashkisë me imazhe që marrin edhe rrugën e botës siç ndodh rëndom për shkak se nuk mund të funksionojë kështu. Nuk mundet dot me paratë e taksapaguesve të stimulohet huliganizmi, të stimulohet rrugaçëria, të stimulohet shëmtia, pisllëku. Nuk mundet. Bashkitë mund të hyjnë patjetër në bashkëpunim me klube futbolli, por mund të hyjnë për të marrë mbrapsht investimin. Ça do me thënë kjo? Jep para për futboll dhe ikin paratë për të gjëmuar topin ca njerëz që sjellin nga mbrapa vetëm rrugaçë? Pse? Për çfarë? Kujt i duhet kjo? Askujt, është një gjynah i madh që duhet të mbarojë”,-tha Rama.
