Kryeministri Edi Rama nga Rrajca tha se qeveria do t’i japë prioritet edhe zhvillimit të zonave rurale. Rama tha se agro-turizmi është një shans i mirë për të dalë nga varfëria, për të gjithë personat që jetojnë në fshat.
Ai komentoi mungesën në takim të kryebashkiakes së Prrenjasit Miranda Rira për shkak se ka lindur. Rama tha se pas 30 qershorit do të ketë më shumë kohë të merret me fëmijën, duke nënkuptuar fitoren e socialistëve në këtë bashki.
“Jam i keqardhur për mungesën e kryetares së Bashkisë por arsyeja e mungesës është e gëzueshme. I uroj edhe 100 bebes së sapolindur të Mirandës dhe kam besim dhe bindje se do t’i krijojmë të gjitha mundësitë Mirandës që të fokusohet më shumë te bebja pas 30 qershorit”, u shpreh Rama.
Gjatë takimit, Rama tha se në sajë të fondeve nga Bashkimi Europian do ofrohet mbështetje për investitorët në zonat rurale.
“Kemi ardhur në këtë zonë kohë më parë dhe kemi përsësritur premtime dhe jemi rikthyer këtu për të nisur punën. Modeli i 100 fshatrave bazohet shumë në nxitjen e agro-turizmit dhe ne ofrojmë fonde për këtë jo kredi. Janë fonde të vëna në dispozicion nga BE nëpërmjet programit për mbështetjen e bujqësisë dhe zhvillimit rural. Nuk janë kredi por para që merren për të reazlizuar projekte në fshat”,deklaroi Rama./Opinion.al
