Punëtorët e rafinerisë së Ballshit dhe Fierit kanë gjetur një zgjidhje origjinale për të ironizuar vendimin e publikuar nga ministri Arben Ahmetaj për pagesën e papunësisë.
Ata kanë përpiluar një shkresë zyrtare të Ministrisë së Financave, me gjasë nënshkruar nga ministri Arben Ahmetaj, në të cilën shkruhet se duke filluar nga data 18.01.2018 për të gjithë punëtorët e rafinerisë Fier dhe Ballsh do të shpërndahen “Fyej”, “Letra”, “Shah”, “Tavlla”, “Tespihe”, “Raketa Tenisi” dhe më kryesorja do të ndërtohen 35 ambiente ku do të luhet kaladibrançe.
Prej ditësh punëtorët e rafinerisë Fier dhe Ballsh kanë dalë në protestë përpara Prefekturës së Fierit, duke e konsideruar vendimin e ministrisë qesharak dhe tallës, ndërsa kanë paralajmëruar përshkallëzim të protestës.
Janë 1200 punonjës të rafinerisë së Ballshit dhe të Fierit që aktualisht janë të papunë ndërsa kompania IRTC u largua. Ministri i Financave dhe Ekonomisë Arben Ahmetaj ka ftuar të gjithë investitorët e interesuar të sjellin propozimet për rafineritë e ARMO-s.
