Kryeministri Edi Rama ka folur sot nga Roskoveci në komunikimin javor me ndjekësit në Facebook, ku tha se lufta politike në 25 qershor nuk është me LSI apo me opozitën, por jetike për reformat për Shqipërinë.
“Njerëzve u ka ardhur në majë të hundës marrëdhënia me administratën, ku ndarja e pushtetit si tepsi cënojnë funksionimin e kësaj marrëdhënie. Partitë e rritura përmes shfrytëzimit të këtij sistemi, përpiqen ta kthejnë këtë kërkesë timen në një gjuhë politike të ulët të mbushur me sharje dhe shpifje. Është puna e tyre. Për mua kjo nuk është luftë politike, qoftë me opozitën apo qoftë edhe për partnerë të koalicioni tonë në këto 44 muaj. Për mua kjo është një luftë jo vetëm shumë parimore, por jetike për Shqipërinë që duam”, tha ai.
Po ashtu Rama tha më tej se nuk ka më asnjë motiv të rrijë kryeministër duke u shantazhuar nga partitë e vogla për insitutcione të ndryshme dhe për vende pune. “Më lejoni sot t’jua them sinqerisht, fare troç, nuk kam më asnjë motiv në karrigen e kryeministrit si deri më sot, duke pranuar që administrata e shtetit të vazhdojë të rrijë peng i partive duke pranuar që për të marrë votat për reformat që të bëjmë shtet të pranojmë shantazhet dhe listat e kërkesave të partive të koalicionet për të lëshuar drejtori në këmbim të votës dhe deri të vend pastruese në institucione për votën për një reformë.” /opinion.al
