Kryeministri Edi Rama ka qenë në qytetin e Bulqizës, nga ku ka promovuar me krenari vendosjen e matësave të energjisë elektrike në çdo shtëpi.
Në një kohë kur mbi gjysma e popullit shqiptar jëton jashtë kufijve për arsye emigrimi dhe kur 1/3 e banorëve aktualë janë shprehur se janë të gatshëm të largohen nga vendi që në mundësinë e parë që do t’iu paraqitej dhe kur papunësia sispas shifrave zyrtare është 16.7%, Rama është kujdesur që në foto të kapë vetëm ata bulqizakë “rilindas”, të kënaqur nga shtrëngimi i radhës i qeverisë.
“Në Bulqizë ku ka përfunduar paisja me matësa të energjisë për të gjitha familjet, duke ardhur drejt fundit përgjithmonë të faturimit aforfe. Po mbyllet në gjithë Shqipërinë procesi e vendosjes së matësit të energjisë në çdo shtëpi dhe biznes. Të gjithë ata që kujtojnë se duke thyer matësin do ti shpëtojnë rregullit të përgjithshëm duhet ta kenë të qartë se nga 1 korriku, kush thyen matësin apo kush refuzon forcërisht vendosjen e matësit, nuk do të marrë më energji elektrike. Matësat janë pjesë e investimit të përbashkët; paguhen me paratë e kontributeve të përbashkëta dhe janë domosdoshmëri, e para për të mos rënduar njerëzit me fatura aforfe, po secili të paguajë atë që konsumon. E dyta për ti dhënë fund dhe për ti vënë pikë historisë që dikush paguan dhe dikush nuk paguan. Kjo histori për ne i takon të kaluarës. Kush do që të jetojë me pahir me të kaluarën, do të jetojë në errësirë, nuk do të ketë drita”, shkruan Edi Rama në rrjetet sociale.
