Ministria e Shëndetësisë ka vendosur që mbajtja e maskave të jetë e detyrueshme, ndërsa ka paralajmëruar ndëshkim për qytetarët që nuk e respektojnë këtë masë anti-COVID.
Ditën e sotme është mbajtur seanca e radhës plenare, ku është diskutuar në lidhje me ndryshimet kushtetuese si dhe për çështjen e listave të hapura.
Ndërkohë, teksa ka marrë fjalën në foltore të Kuvendit, kryeministri Edi Rama iu ka tërhequr vëmendjen disa deputetëve pa maska duke iu kujtuar se është bërë e detyrueshme mbajtja në ambiente publike. Një prej tyre dhe deputetja Rudina Hajdari.
“Halit vëre maskën, zonja Hajdari të lutem maskën. Maska është tanimë e detyrueshme në ambiente të mbyllura dhe nuk është aspak e domosdoshme në mjedise të hapura. Me këtë rast përfitoj t’iu përgjigjem të gjithë atyre që kur unë shfaqem në rrugë më kritikojnë që jam pa maskë. Në mjedise të hapura mjafton ruajtja e distancës minimale dhe moskontaktimi me shtrëngim duarsh. Në mjedise të mbyllura, tanimë dhe me një vendim zyrtar të MSH maska është e detyrueshme dhe është vërtetë e rëndësishme që Kuvendi do japë shembullin e vet”, tha Rama.
Por, teksa Rama fliste, Hajdari i ka çuar një maskë të bardhë në foltore që kryeministri e ka parë si një shenjë paqeje.
“Kur flitet s’ka nevojë. Faleminderit gjithsesi, një flamur i bardhë paqeje të cilin e pres me kënaqësi”, tha Rama./ Opinion.al
