Nga Lezha, ku ka folur për kalendarin e festave lokale të vitit 2019 dhe strategjinë e turizmit, kryeministri Edi Rama ka ironizuar protestat e opozitës. Ai tha se meqë protestat organizohen me orare dhe skenografi të paracaktuara, mund të përfshihen në listën e atraksioneve turistike.
“Protestat mund t’i shohim si atraksion turistik. Ndoshta jemi një vend që ofrojmë protesta. Duke qenë se janë protesta që janë me orare, me stacione të përcaktuara, me gjithë skenografinë për të impresionuar njerëzit në ekrane dhe rrinë në perimetra shumë të vegjël, fare mirë mund të përfshihen në kalendarin turistik duke i thënë vizitorëve që të ndjekin një protestë. Megjithëse mund të marrim riskun se mund të numërohen si protestues dhe rritet numri i tyre artificialisht”, ka thënë Edi Rama.
Ditën e djeshme opozita zhvilloi protestën e dytë me bllokim rrugësh. Trafiku u paralizua për rreth dy orë në rrugët nacionale të 12 qarqeve të vendit, ndërsa u paralajmërua përshkallëzimi i tyre./Opinion.al
