Kryeministri Edi Rama ka reaguar me ironi, për vendimin e opozitës për të djegur mandatet. Në një postime në Twtter, shefi i qeverisë shqiptare e krahason Partinë Socialiste me skuadrën italiane të futbollit, Juventus. Sipas tij tani që kjo skuadër vetëm po fiton, kush është mbrapa të djegë fanellat e iki nga fusha.
“Ky Juventusi s’durohet më! Të anullohet kampionati. Kush është mbrapa të djegë fanellat e iki nga fusha.Kjo skuadër e poshtër të heqë dorë nga avantazhi, të mos e bëjë më vetë formacionin dhe të fillojë ndeshjet nga e para! Ndryshe s’ka më futboll, po vetëm e ka kush e ka rrugëve”, shkruan Rama.
Propozimi i kryetarit Lulzim Basha për djegien e mandateve u mbështet unanimisht nga grupi parlamentar i Partisë Demokratike, por vendimi përfundimtar i takon forumeve më të larta të partisë. Më pas Basha mori dhe garancinë e aleatëve, ndërsa i dha përgjigje komenteve të Ramës se “opozita luan bllofin me mandatet”.
“Sot ka ndodhur një akt i paprecedentë në historinë 28-vjeçare të pluralizmit. E gjithë opozita ka marrë një vendim për t’iu bindur urdhrit të qytetarëve shqiptarë, që u derdhën me trajtën dhe formën e sovranit në protestën mbarëkombëtare të 16 shkurtit. Të tjerat janë budallallëqe për të devijuar të vërtetën. E vërteta është kjo: Edi Rama nuk është më kryeministri i shqiptarëve. Parlamenti nuk është legjitim”, tha Basha. G.F/Opinion.al
