Kryeministri, Edi Rama, i dorëzoi sot, Alvin Karaqit, kampionit shqiptar të karatesë “Yllin e Mirënjohjes Publike”.
Gjatë fjalës së mbajtur, 30-vjeçari s’ka mundur t’i mbajë lotët, teksa ka thënë se ditën kur i ofruan mbajtjen e flamurit kuqezi në ceremoninë hapëse të Kampionatit Evropian, u ndje si heroi kombëtar Gjergj Kastrioti.
“Dita kur mora flamurin për të përfaqësuar Shqipërinë në ceremoninë e hapjes, aty ishte medalje ime. Për besë u ndjeva si Gjergj Kastrioti. Faleminderit të gjithëve që më keni ndihmuar, familja, trajneri. Kemi një histori në sport, duket të luftojmë që kjo shqiponjë të jetë krenare. Veç kushteve, duhet edhe ndjenja që i japim njëri-tjetrit. Unë nuk e përjetova medaljen, sepse kur e fitova shkova në punë në spital. Më falni për këto emocione, por uroj që sportistët dhe ata të karatesë ta përjetojnë këtë ndjenjë që po ndjej unë tani”, tha Karaqi i përlotur.
