Teksa në Shqipëri ndizet debati mes Kryeprokurorit të Shtetit dhe ambasadorit më të fuqishëm në Shqipëri, amerikanit Donald Lu, Kryeministri Edi Rama ka zgjedhur të vizitojë Kosovën. Ai ka qenë dje në Kosovë, ku vazhdon të jetë edhe sot kur në Tiranë mblidhet Këshilli i Sigurisë Kombëtare për Balilin.
Gjatë mbrëmjes së djeshme, Kryeministri shqiptar bashkë me Presidentin e Kosovë, Thaçi, ishin në studion e Baton Haxhiut në Klan Kosova.
Ndër të tjera, Rama do të shprehej se Shqipëria dhe Kosova janë bashkë dhe nëse cenohet një centimetër tokë do të përgjigjemi, duke hapur kështu llogore të reja në debatin dhe konfliktin politik Kosovë-Serbi.
“Nëse serbët duan të hipin nëpër trena që i çojnë ata prapa në histori, por nuk i prekin asnjë fije floku Kosovës, ne nuk kemi ç’u bëjmë. Por nëse duan të cënojnë një centimetër të territorit tonë, jemi të gatshëm të përgjigjemi”, tha Rama.
Më tej do të shprehej: “Praktikisht çështja e territorit të Kosovës është mbyllur ditën kur është firmosur Pavarësia e saj. Të dy vendet tona janë vendosmërisht krah për krah për të promovuar paqen. Janë krah për krah edhe për të mbrojtur integritetin. Nuk ka shans që Kosova të cënohet qoftë edhe në një centimetër katror të territorit të saj. Ai mur nuk është se sfidon realisht sovranitetin e Kosovës. Është shfaqje brutale e një ideologjie shumë të prapambetur. Jam i bindur që pavarësisht si do të dalë në fund kjo histori, nuk është e tillë ku pala tjetër duket mirë. Ne jemi në anën e duhur të historisë dhe e duhura është ana e urës, jo e murit”.
Sipas kryeministrit shqiptar, muri dhe provokimet e Serbisë janë për keqardhje dhe shqiptarët nuk duhet të bien pre e tyre, por të vazhdojnë rrugën për të ndërtuar paqen.
“Besoj që shfaqja e këtij muri absurd, apo e atij treni absurd janë shfaqje të një makthi që nuk është i yni – është i fqinjve tanë. Janë shfaqje që shkaktojnë keqardhje. Janë fqinjët tanë që janë për të ardhur keq që shfaqen në forma të tilla dhe deri në nivelet me të larta kapen për të ndërtuar një politikë që nuk i duhet dreqit, lëre më popullit serb. Ne duhet të vazhdojmë t’i besojmë rrugës sonë. Këto shfaqje nuk tregojnë se paqja që kërkojmë është e gabuar, por se nuk është e lehtë. Nuk cënojnë dinjitetin e shqiptarëve, as integritetin e Kosovës, as imazhin pozitiv që shqiptarët kanë ndërtuar që nga momenti i parë i ndërtimit të shtetit në Kosovë. Ndaj unë besoj që ka një konsum të tepruar të këtyre ngjarjeve deri në histeri, për të nxitur imagjinatën e një konflikti të mundshëm, që nuk është i yni. Nëse Serbia nuk e njeh Kosovën nuk do të clirohet nga ky makth”.
Duke u ndalur tek komenti i Vuçiç për vizitën e Kryeministrit në zyrat e Aleancës për Ardhmërinë e Kosovës, tha theksoi se Vuçiç nuk duhet të vizitojë ekstremistët në Serbi ashtu sikurse nuk duhet të shqetësohet kë viziton ai në Kosovë.
/Opinion.al
