Prej disa ditësh vendi po regjistron shifra të larta të infektimeve me COVID-19. Në këtë situatë kryeministri, Edi Rama, gjatë bashkëbisedimit të sotëm me gazetarët ka paralajmëruar gjoba ndaj subjekteve politike që nuk respektojnë masat anti-COVID.
Kreu i qeverisë deklaroi se çdo lloj denoncimi që do të bëhet publik nga çdo lloj takimi i kujtdo qoftë do të ndëshkohet përfshirë dhe Partinë Socialiste.
“Kam parë që shkeljet janë transversele. Që të gjithë i bëjnë, që nga Presidenti, tek Partia Demokratike, tek ndërmarrja e Presidentit edhe tek Partia Socialiste. Do të shikojmë edhe sanksionet për partitë politike pa asnjë përjashtim. Çdo lloj denoncimi që do të bëhet publik nga çdo lloj takimi i kujtdo qoftë do të ndëshkohet, dhe do ndëshkohet personalisht me gjobë ai që i bën këto takime. Unë personalisht jam shumë strikt për veten time dhe nuk ka arsye që të tjerët mos të bëjnë të njëjtën gjë se nuk është ndonjë çudi, është thjesht të zbatosh ligjin. Policia e Shtetit duhet të bëjë detyrën me të gjithë njësoj, nuk duhet të tolerojë askënd. Asnjë politikan, duke filluar nga ata të PS në qoftë se shkelin rregullat. Është e pa tolerueshme dhe është tërësisht e pasjellshme”, tha Kryeministri Edi Rama./Opinion.al
