Kryeministri Edi Rama dhe zv.kryeministrja njëkohësisht ministrja e Infrastrukturës dhe Energjisë, Belinda Balluku kanë inspektuar punimet në rrugën Ndroq-Plepa, projekt i cili është në fazën e parë të rehabilitimit.
Gjatë inspektimit, Rama tha se ky projekt infrastrukturor do të jetë një aks me profil turistik.
“Është një nga akset e shumëkërkuara që i erdhi rradha dhe i cili do të jetë një aks me profil turistik. Ne besojmë shumë që zhvillimi i agroturizmit do të jetë shumë pozitiv edhe për ekonominë e kryeqytetit dhe për ekonominë familjare këtu, pasi ëhstë një zonë që do të përfitojë shumë nga rritja e turizmit dhe nga flukset që shkojnë drejt Tiranës apo Durrësit”, theksoi Rama.
Ndërkohë, Balluku shprehet se ka pasur një ecuri të mirë në punime dhe pretendohet që të mbyllet brenda muajit Dhjetor.
