Kreu i LSI-së, Ilir Meta ka hedhur poshtë ditën e sotme deklaratën e kryeministrit Rama ku e cilësonte Metën si një President “me PD-në por jo i PD-së”. Meta ka marrë shkas nga një takim të cilin zhvilloi ditën e sotme në Tiranë me anëtarë të LSI-së, për të shprehur mendimin e tij në lidhje me deklaratën e Ramës.
Kryeministri Edi Rama i ftuar në “Top Story”, është shprehur se Ilir Meta është presidenti ideal për Opozitën.
“Sot unë jam shumë i qetë përpara shqiptarëve, sepse realisht president më me PD-në, por jo i PD-së, sesa Ilir Meta ne nuk mund të gjenim dot as në PD”, tha Rama.
Por duket se kreu I LSI-së nuk ka qënë aspak dakort me këtë deklaratë, të cilën nuk hezitoi ta përgënjeshtronte.
“Jam akuzuar shpesh se jam aq i disponueshëm për të përkrahur opozitën sa jam akuzuar se s’kishin ku te gjenin president më të afërt me PD-në, gjë qe mendoj se s’është e vërtetë. Siç me tha Namik Dokle president më socialist se ty vështirë të gjenin”, tha sot Meta, gjatë një takimi në Tiranë me anëtarë të LSI-së.
Por Meta dha edhe një mesazh për opozitën, ku cilësoi se bojkoti nuk është zgjidhje.
“Ne demokraci s’mund ti japin të gjitha. Duhet ti fitosh të drejtat që i takojnë opozitës dhe qytetareve. Ndaj opozita duhet të luftojë, sepse bojkoti s’është zgjidhje”.
