Kryeministri, Edi Rama në një takim të zhvilluar sot me studentët përfitues të programit të ri të bursave, u ndal tek fenomeni i largimit të mjekëve dhe infermierëve drejt Gjermanisë.
Rama tha se një student i Fakultetit të Mjekësisë i kushton shtetit shqiptar 15 në 16 të shpenzimeve të tij, pasi sipas kryeministrit, studenti me tarifën e shkollimit që paguan mbulon vetëm një pjesë simbolike të shpenëzimeve për shkollimin e tij ndërsa pjesa tjetër paguhet nga taksapaguesit shqiptarë.
Teksa tha se qytetarët shqiptarë kanë të drejtëv të kenë mjekë, kreu i qevrisë theksoi se do të jetë obligim që një student në përfundim të studimeve të qëndrojë 3 vjet në Shqipëri.
“Vendi ynë ka nevojë për të gjitha shërbimet dhe shërbimet kanë nevojë për njerëz të kualifikuar. Pavarësisht se trendi është i tillë që gjithmonë e më shumë bluza të bardha po spostohen drejt Gjermanisë, ne nuk mund të pajtohemi me idenë që mund të mbetemi pa mjekë dhe pa infermierë. Deri sot, balanca është e qëndrueshme edhe pse nuk është një balancë e sigurtë për të nesërmen. Detyra jonë është që ta bëjmë një balancë të sigurtë. Në bazë të një studimi të bërë nga Fakulteti i Mjekësisë, një student mjekësie në Shqipëri i kushton shtetit 15 në 16 dhe me tarifën e tij, studenti mbulon 1 të 16-ën e kostos të studimit të tij, pjesa tjetër mbulohet nga shteti. Mjekët tanë mund të shkojnë lirisht në Europë, nuk është një fakt para të cilit ne mund të dorëzohemi dhe është një fakt para së cilit duhet të reagojmë. Shteti shqiptar nuk mund të vazhdojë të paguajë 15 në 16 pjesë të studentëve të mjekësisë nëse studenti nuk është i gatshëm që t’i kthejë shtetit investimin që shteti bën për të. Qytetarët shqiptarë kanë të drejtë të kenë mjekë.
Ne edhe këtu do të ndërhyjmë me një politikë të diferencuar. Dua të qëndroj tek politika për të cilën ju keni ardhur këtu që foli dhe studenti i cili ka marrë një medalje të artë dhe të cilit i takon kjo bursë e barabartë me pagën minimale. Përkundër obligimit të pranuar prej tij, që të paktën 3 vjet pas studimeve do të qëndrojnë në Shqipëri dhe kështu duhet të jetë dhe për të tjerët më pas që do të marrin një shërbim arsimor të lartë me kontribut masiv nga shteti shqiptar. Kjo politikë është një politikë e re që vjen si rezultat i një reflektimi mbi një politikë tjetër që i përket vitit 2007, nga qeveria e mëparshme, i ashtuquajturi fondi i ekslencës, i ndërtuar për të mbështetur studentët shqiptarë me qëllimin që në kohën që këta studentë shqiptarë nuk kanë mundësi të përballojnë shpenzimet deri në 70 mijë dollarë në vit për universitetet jashtë vendit, shteti t’i mbulojë dhe ata të kthehen për të kontribuar për shtetin”-tha Rama.
