Ndërsa gjatë ditës së hënë do të ketë një lehtësim të masave për biznesin, Kryeministri Rama parlajmëron të gjithë qytetarët që kanë aktivitete biznese të tregohen të kujdesshëm dhe të verifikojnë aktivitetin në portalin e –Albania. Sipas Ramës ka dyqane jo ushqimore që lajmërojnë hapje dhe kjo është në kundërshtim me ligjin.
Kryeministri njofton se duke parë ecurinë e virusit, do të vendoset dhe lajmërohet në ditët në vijim hapja e mundshme e një blloku tjetër biznesesh gjatë javës së mëtejme 27 Prill – 3 Maj.
“Kujdes! Konstatojmë se ka dyqane joushqimore që lajmërojnë hapje për nesër! hap i nxituar në kundërshtim me ligjin çdo hapje e pamiratuar nga ministria e shëndetësisë!
Bizneset e lejuara, në bazë të urdhërit të ministres së shëndetësisë për javën e ardhshme (20-26 prill), janë të publikuara në portalin e-albania, së bashku me protokollet përkatëse të sigurisë shëndetësore.
Hapja e çdo aktiviteti tjetër jashtë asaj liste të miratuar është e kundërligjshme. e-albania do të ketë gati nga sot në mbrëmje edhe lejen për ushtrim aktiviteti në bazë të listës së miratuar, të cilën çdo biznes duhet ta disponojë nga e marta e tutje për ushtrimin e veprimtarisë së vet.
Ju lutem verifikoni në faqen e e-albania nëse biznesi juaj mund të hapet nesër. Duke parë ecurinë e përballjes me Armikun e Padukshëm, do të vendoset dhe lajmërohet në ditët në vijim hapja e mundshme e një blloku tjetër biznesesh gjatë javës së mëpastajme (27 PRILL – 3 MAJ)”, shkruan Rama.
