Në konferencën e tij të fundvitit me gazetarët, kryeministri Edi Rama tha se kryebashkiakut Erion Veliaj i është bërë një linçim publik, i cili sipas tij po bëhet i neveritshëm.
Nuk ka munguar as reagimi nga lideri i PD-së, Sali Berisha, i cili thotë se kjo ishte një kthesë 180 gradë e kryeministrit, i cili tashmë i ka firmosur Veliajt azilin politik.
“Edi Rama i bëri dje Erion Veliajt dhuratën më të pazakontë për Vitin e Ri 2025. Ai de-fakto, me deklaratën e tij që Erion Veliajn po e linçojnë në vendin ku ai është kryeministër, i firmosi lejen e azilit politik, pothuajse në cilindo vend që ai ta kërkojë, pasi linçimi është një akt i dënueshëm dhe që meriton mbrojtje kudo që kërkohet. Pardje, Edi Rama deklaroi se Erion Veliaj po hetohet si të gjithë të tjerët dhe çdo njeri mund të hetohet dhe çdo i hetuar nuk është i fajshëm, dje e ndërroi 180 gradë. Thuhet se Rama mori një ultimatum nga Erion Veliaj, më të cilin i thotë që ato që bëre ndaj meje, do i kesh në kurriz, por jo vetëm, por së bashku me Lindën dhe familjen. Ky kërcënim, detyroi Ramën të bëjë një kthesë prej 180 gradësh dhe të firmosë lejen e azilit politik, për njeriun me të cilin kanë vjedhur së bashku qindra e qindra milionë”, tha Berisha.
