Pas vizitës në Beograd dhe takimit me përfaqësues të Luginës së Preshevës kryeministri shqiptar iu përgjigj interesit të mediave shqiptare për efektet që do të prodhoje ky proces dialogu me Serbinë për të ardhmen ekonomike të dy vendeve
Kryeministri, Edi Rama: Unë jam i bindur që Shqipëria do të bëhet gjithmonë e më shumë një destinacion për sipërmarrjen dhe për turistët serbë, nëse do të plotësohet dhe objektivi për të pasur një aks rrugor që do të lidhi praktikisht, Beogradin me Prishtinën dhe përmes rrugës së Kombit pastaj, edhe Durrësin.
Kryeministri nuk mohon vështirësitë në diskutimet me homologun e tij serb, por thotë se takimet e zhvilluara kanë ndikuar që Serbia të ndryshojë qasje ndaj problemeve të shqiptarëve në Luginën e Preshevës.
Kryeministri, Edi Rama: Dy vjet më parë, biseda ishte shumë e vështirë. Sepse ai as nuk e pranonte dot që unë të flisja për shqiptarët e Preshevës; “Çfarë pune ke ti me shqiptarët e Preshevës? Janë qytetarë serbë. Janë banorë të Serbisë. Ndërsa sot, ne u takuam edhe me të dhe realisht janë bërë disa gjëra pozitive dhe edhe atmosfera mes përfaqësuesve shqiptarë të Preshevës është shumë më pozitive, në kuptimin që ka një shpresë se gjërat do të përmirësohen.
I pyetur për bojkotin që autoritet kosovare i bënë Forumit Ekonomik që u mbajt në Serbi, kryeministri Rama tha se mungesa e dialogut me Serbinë nuk i Shërben as Shqipërisë dhe as Kosovës.
Kryeministri, Edi Rama: Unë nuk kam asnjë mësim për të dhënë dhe asnjë këshillë të pa kërkuar për askënd, aq më pak pastaj për lidershipin në Kosovë. Unë thjesht them se duke qënë fitimtarët e luftës dhe duke pasur avantazhin e madh moral të fitimtarit nuk duhet t’i shmangemi asnjë mundësie për të komunikuar. Nuk është proces që politika mund ta marri, ta mbylli në sallën e Parlamentit e ta kthejë në arenë për t’u kacafytur mes veti se kush e do më shumë Kosovën, kush e do më shumë Shqipërinë, kush e do më shumë flamurin. Përsa më takon, unë do vazhdoj të bëj atë që mendoj se është gjëja më e mbarë për shqiptarët e Shqipërisë dhe patjetër, kur flas për Kosovën, dhe për shqiptarët e Kosovës./TV KLAN
