Kreu i Departamentit të Rendit e Sigurisë, Enkelejd Alibeaj në një konferencë për mediat nga selia e PD-së akuzoi Kryeministrin Rama se po fsheh planin për të kthyer në pallat fushën tek aneksi i Stadiumit Qemal Stafa.
Sipas tij, plani i Ramës është për të ndërtuar një kullë betoni ku besohet se kumbari ka bashkuar interesat e dy bandave të tij të preferuara. Të Shullazit dhe Hakmarrjes për Drejtësi.
“Ne e denoncuam dy ditë më parë këtë projekt kriminal të Edi Ramës. Ai heshti”, tha Alibeaj, duke vijuar se”heshti, sepse ai është arkitekti i zhdukjes së kësaj hapësire, i kthimit të saj në një masiv betoni për interesat e tij dhe të bandave të tij”.
“Kjo fushë (në foto) ishte parashikuar të bëhej lulishte dhe ishte përfunduar projekti i saj nga bashkia e drejtuar nga z.Basha. Një projekt që është hedhur poshtë tashmë, dhe ku pritet të mbillet nga Edi Rama pallati i bandave.
Edi Rama vazhdon kështu pa u ndalur në trajtimin e Tiranës si plaçkë, në ndarjen e trojeve më të çmuara të qytetit për klientët dhe banditët e tij.
Qytetarët e Tiranës nuk mund të lejojnë që Edi Rama t’u marrë fushat, hapësirat, liqenin, parkun, stadiumin, për të ushqyer bandat dhe klientelën e tij.
Eshtë koha e një bashkimi të fuqishëm kundër këtij sundimi kriminal”, deklaroi Alibeaj.
