Flotës që operon përmes Aeroportit Ndërkombëtar “Nënë Tereza” do t’i shtohet tashmë edhe kompania e njohur “Ryanair”, me 18 destinacione, nga të cilat 9 do të jenë të reja.
Kryeministri Edi Rama dhe zv/kryeministrja, njëherësh ministre e Infrastrukturës dhe Energjisë, Belinda Balluku morën pjesë sot në inaugurimin e kompanisë “Ryanair”, në ambientet e Aeroportit Ndërkombëtar “Nënë Tereza”.
Në fjalën e mbajtur me këtë rast, Rama u shpreh se “Ryanair” është vula që i vihet një vendi kur ai vend kthehet në destinacion global.
“E kam pritur prej kohësh këtë ditë dhe kjo lidhet me kompaninë ‘Ryanair’. Shefi i kompanisë nuk tha të gjithë të vërtetën, sepse ne kemi kërkuar prej kohësh kompaninë ‘Ryanair’ dhe hezitimi për të ardhur në Shqipëri nuk ka qenë thjesht i lidhur me taksën e lartë të aeroportit, por me një fakt tjetër që ma ka shpjeguar dikush disa vite më parë. I thashë si t’ia bëjmë të sjellin ‘Ryanair’ dhe më tha: ”Ryanair’ nuk është kompani fluturimi, është vula që i vihet një vendi kur ai vend kthehet në destinacion global. Fakti që ‘Ryanair’ ju shmanget do të thotë se akoma nuk keni arritur të ktheheni në destinacion turistik global’”, tha Rama.
Kryeministri shprehu bindjen se ardhja e “Ryanair” me 18 destinacione nga Tirana në Europë tregon se ne kemi marrë një vulë të rëndësishme, e cila vjen pas një përpjekje të gjatë për të ndryshuar katërcipërisht jo vetëm imazhin e Shqipërisë.
“Shqipëria sot është në të gjitha mediet ndërkombëtare si vendi që duhet vizituar. Shqipëria ka pasur detin po kaq të bukur edhe 10 vite më parë, edhe diellin po kaq me shkëlqim, edhe malet aty edhe 10 vite më parë, por për fat të keq nuk ka pasur një gjë tjetër për të mundësuar që të gjithë, nga të katër anët e botës të duan të vijnë në Shqipëri”, tha Rama.
“Sot isha me organizatorët e UNUM në Shëngjin. Kam qenë në edicionin e parë të festivalit ku mezi iu mblodhën 1500 veta, edicioni që sapo u mbyll regjistroi 20 mijë veta nga dhjetëra e dhjetëra kombësi jo vetëm nga Europa, por edhe nga Meksika, Amerika Latine, Katari, Arabia Saudite e plot destinacione të tjera. Sot organizatorët e festivalit e kishin hallin si do të përballonin fluksin që mund të shkojë shumë shpejt në 40 mijë apo 60 mijë vetë, pasi kjo bie ndesh pastaj me natyrën e festivalit”, tha Rama.
Rama theksoi se në Aeroportin Ndërkombëtar “Nënë Tereza”, fluksi i udhëtarëve po vendos rekorde duke kapur shifra të paimagjinueshme deri para pak kohësh dhe falë investimeve të realizuara kanë transformuar rrënjësisht të gjithë hapësirën duke krijuar lehtësira për të gjithë pasagjerët.
“Aeroporti i Tiranës është një histori e madhe suksesi i një kompanie shqiptare. Pas vitesh të tëra nën thundrën e një koncesioni që nuk dua të dyshoj se është bërë me qëllime të mira, pasi në atë kohë e në të gjitha rastet solli ndryshim në Aeroportin e Rinasit, dhe nga ana tjetër ishte një koncesion i tmerrshëm për kushtet në të cilat vinte shtetin dhe pasagjerët”, shtoi ai.
Rama tha se për shkak të atij koncesioni Tirana ishte aeroporti më i shtrenjtë i Europës për kompanitë dhe një vend ku biletat ishin jashtëzakonisht të shtrenjta.
“Kjo situatë është përmbysur katërcipërisht. Ne jo thjesht e kemi çliruar aeroportin nga thundra e tij koncesioni, por kjo ishte edhe rezultat i ambicies dhe kurajos së kompanisë e cila e mori aeroportin nga të huajt”, tha Rama.
Ai theksoi se sot faktet flasin se jemi në kushtet e një historie krejt tjetër dhe aeroporti është ende një qenie në zhvillim.
“Jam i bindur se shumë shpejt do të lindë nevoja për të tjera hapësira e facilitete. Zgjidhja e problemit kronik të parkimeve është tashmë në rrugë, ashtu sikundër edhe investimi i madh që po përgatitet të bëjë kompania për energjinë diellore është një tjetër lajm jashtëzakonisht pozitiv”, tha Rama.
