Kryeredaktori i gazetës ‘Panorama’, Robert Rakipllari, të martën, deklaroi se largimi i ish-ministrit Fatmir Xhafaj ka ardhur si rezultat i operacionit të fundit të arrestimeve.
Rakipllari u shpreh në studion e emisionit ‘Opinion’, se megaoperacioni i shërbei qeverisë, por ishte një operacion që kaloi të fortit.
Rakipllari: Është e vërtetë se dorëheqja e ministrit na kapi të gjithëve të papërgatitur, Unë mendoj se nuk ka ndodhur të premten, pasi në tekstin e botuar nga faqja e Ministrisë së Brendshme thuhej se ka ndodhur ditën e enjte. Nga ajo që thuhet ka pasur një krisje te fortë në marrëdhëniet e ministrit me kryeministrin. Xhafaj kishte një lloj autonomie në ushtrimin e detyrës, megjithatë kryeministri e mbështeti përgjatë sulmeve të opozitës. Ai nuk ishte aty se ishte i besueshmi i kryeministrit, por ai ishte aty si një përfaqësues i socialistëve dhe i rekomanduar nga ndërkombëtarët.
