Këshilli bashkiak i Kamzës është konstituuar ditën e sotme dhe më pas është bërë betimi i kryetarit të ri të Bashkisë Rakip Suli. Mbledhja nuk u zhvillua në ambientet e bashkisë por në shkollën “Hilary Clinton”.
Nga ana tjetër në zyrën e kryebashkiakut vazhdon të qëndrojë Xhelal Mziu, i cili nuk e njeh procesin e 30 qershorit. Në 30 qershor sipas tij nuk pati zgjedhje të ligjshme dhe Rakip Suli nuk përfaqëson askënd pasi në këto votime morën pjesë vetëm 6% e zgjedhësve.
“Vazhdoj funksionin për të cilin jam mandatuar. Zoti Suli përfaqëson një proces farsë ku morën pjesë në votime vetëm 6% të banorëve të Kamzës. Nuk besoj se pati zgjedhje më 30 qershor. Suli mori 4 herë më pak vota se kandidati i mëparshëm i PS në Kamëz. Ky është një uzurpim i institucioneve, ia kalojnë dhe kohës së Enver Hoxhës. Kemi një qeveri, parlament të një partie. Kush e njeh demokracinë e di se në 30 qershor nuk pati zgjedhje. Do vazhdojë detyrën sot deri në orarin zyrtar dhe nesër në orën 08:00 do kthehem sërish” u shpreh Xhelal Mziu
Suli u shoqërua në ceremoni nga deputetët Taulant Balla, Ervin Bushati dhe Prefektja e Tiranës Suzana Jahollari. Ai shprehu mirënjohjen e tij për qytetarët që kishin votuar në 30 qershor pavarësisht atyre që ai i cilësoi shantazhe.
“Na pret një rrugë e gjatë dhe me sfida. Shpreh mirënjohjen time më të madhe për qytetarët e Kamzës dhe Paskuqanit, të cilët u shantazhuan me 30 qershor, por nuk u lëkundën në mbrojtjen e familjes së tyre, jam mirënjohës për skuadrën e 30 qershorit. Jam krenar që këshilli i ri përbëhet mbi 50 për qind femra dhe mbi 60 për qind të rinj dhe të reja. Ne kemi bindjen absolute dhe me një skuadër absolute ne do t’ia dalim. Do t’ia dalim dhe do të bëjmë më të mirën për qytetarët e Kamzës dhe të Paskuqani,. Do të shërbej me përgjegjësi dhe me dinjitet. Ne nuk i ndajmë njerëzit në të majtë dhe në të djathtë, por ne jemi për t’iu shërbyer qytetarëve”-tha Suli gjatë ceremonisë së betimit. /Opinion.al
