Televizioni italian “RAI3” ka transmetuar një reportazh mbi marrëveshjen mes Italisë dhe Shqipërisë për kampet e refugjatëve që pritet të ndërtohen në vendin tonë.
Mes të tjerash, në këtë reportazh thuhet se njeriu kyç në marrëveshjen e kërkuar nga qeveria Meloni është Engjëll Agaçi.
Agaçi është sekretari i Përgjithshëm i Këshillit të Ministrave, ndërsa në reportazh ai quhet ish-avokat i trafikantëve të drogës.
Por nuk ka vonuar edhe reagimi i Agaçit, i cili tha për median italiane “La Repubblica” se do të padisë për shpifje ndaj emisionit.
Krahasimi i bërë nga programi televiziv sipas Agaçit, është shumë i dëmshëm për reputacionin e tij.
“Kam lënë detyrën ligjore dhjetë vjet më parë dhe krahasimi i bërë nga programi televiziv Report është shumë i dëmshëm për reputacionin tim. Unë kam udhëzuar tashmë avokatët e mi italianë që të ngrenë një padi për shpifje kundër programit televiziv shtetëror italian. Burimet duhet të verifikohen dhe po ashtu edhe lajmet”,-ka thënë Agaçi në reagimin e tij.
