Ministri i Jashtëm në detyrë Gent Cakaj ka njoftuar se ka patur një komunikim me ministrin grek Miltiadis Varvitsiotis lidhur me radhët e gjata të krijuara në pikat doganore të Kakavijës dhe Kapshticës. Cakaj njofton se është folur për të mundësuar lehtësimin e qytetarëve, por pa bërë të ditur nëse është marr ndonjë masë konkrete apo një premtim nga pala greke.
“Pata një telefonate me MinistrinVarvitsiotis. Diskutuam mbi nevojën për të bashkëpunuar në lehtësimin e kalimit në Kakavijë. Duke respektuar të gjitha masat dhe duke forcuar grupet e punës në kufij, ne jemi duke e ndjekuar situatën në mënyrë që të lehtësojmë peshën në kufirin mes nesh”, shkruan Cakaj.
Edhe pse qeveria greke prej ditësh kishte njoftuar shtrëngimin e masave në kufirin shqiptar, duket se pala shqiptare nuk ka kryer asnjë lëvizje të mëparshme, për të parandaluar situatën e krijuar tashmë./Opinion.al
