Ekipi i kërkim shpëtimit ka mundur të gjejë trupin e pajetë të alpinistit nga Kosova, i cili humbi jetën një ditë më parë pasi ra nga lartësia në Tropojë.
Sipas uniformave blu, mësohet se ngjarja ndodhi në vendin e quajtur “Maja e thatë”, ku 30-vjeçari dyshohet se për shkak të terrenit të thepisur malor, ra nga lartësia dhe për pasojë humbi jetën.
Po ashtu u bë e mundur edhe nxjerrja e tre personave të tjerë, po nga Kosova, të cilët kishin mbetur të bllokuar.
“Në vijim të informacionit të dhënë ditën e premte, për një shtetas kosovar, i cili në vendin e quajtur “Maja e thatë”, dyshohet se për shkak të terrenit të thepisur malor, kishte rënë nga një lartësi dhe për pasojë kishte humbur jetën , ju informojmë se;
Kërkimet kanë vijuar që prej mëngjesit të sotëm nga shërbimet e Policisë Tropojë së bashku me ekipin e kërkim-shpëtimit malor të Kosovës.
Nga ekipi i kërkim-shpëtimit është bërë e mundur nxjerrja e trupit të pajetë të shtetasit 30 vjeç, i cili do të transportohet drejt morgut.
Ndërkohë, shërbimet e Policisë Tropojë dhe ekipi i kërkim-shpëtimit kanë nxjerrë dhe tre shtetas të tjerë kosovarë të cilët kishin mbetur të bllokuar dhe ishin në gjendje të mirë shëndetësore”, njofton policia.
