Kryetari i bashkisë së Nju Jorkut, Eric Adams, ka shpallur gjendjen e jashtëzakonshme për të trajtuar një “situatë krize” për shkak të fluksit të emigrantëve.
Më shumë se 17,000 kanë mbërritur në qytet nga kufiri jugor që nga prilli.
Shtetet republikane si Teksasi, Arizona dhe Florida kanë dërguar emigrantë në zonat demokratike muajt e fundit.
Është pjesë e një mosmarrëveshjeje me Shtëpinë e Bardhë, ndërsa numri i njerëzve që mbërrijnë në kufirin SHBA-Meksikë rritet.
Që nga shtatori, mesatarisht pesë deri në gjashtë autobusë kanë mbërritur në qytet çdo ditë, tha Adams në një konferencë për shtyp të premten. Ai tha se një në pesë persona në sistemin e strehimoreve të qytetit është aktualisht azilkërkues.
Shumë nga ata që vijnë janë familje me fëmijë të vegjël dhe kanë nevojë për kujdes mjekësor, tha ai.
Fluksi i emigrantëve pritet t’i kushtojë Nju Jorkut 1 miliard dollarë këtë vit fiskal dhe kryebashkiaku po bën thirrje për fonde federale dhe shtetërore për të ndihmuar me kostot.
“Njujorkezët janë të zemëruar”, tha kryebashkiaku Adams. “Edhe unë jam i zemëruar. Ne nuk e kemi kërkuar këtë. Nuk ka pasur kurrë ndonjë marrëveshje për të marrë përsipër punën e mbështetjes së mijëra azilkërkuesve.”
“Qytetit do t’i mbarojnë fondet për prioritetet e tjera. Qyteti i Nju Jorkut po bën gjithçka që mundemi, por ne po arrijmë kufirin e mundësisë sonë për të ndihmuar. Shërbimet sociale të qytetit “po shfrytëzohen nga të tjerët për përfitime politike”, shtoi ai.
Si pjesë e deklaratës së tij të urgjencës, kryetari i bashkisë së Nju Jorkut lëshoi një urdhër ekzekutiv që lejon qytetin të dedikojë burime për të mbështetur azilkërkuesit dhe për të përshpejtuar çdo përpjekje për përgjigje.
Një zëdhënëse e guvernatorit të Teksasit Greg Abbott hodhi poshtë deklaratën e kryetarit të bashkisë të premten.
