Si çdo të mërkurë, kryeministri Edi Rama ka marrë pjesë në takimin me koordinatorët e bashkëqeverisjes, ku është njohur me disa nga problemet e zgjidhura për qytetarët. Një prej tyre ishte larguar padrejtësisht nga puna në Ministrinë e Turizmit. E prekur, qytetarja nga Vlora tregoi se edhe pse kishte fituar gjyqin e vetme pa avokat, sërish vendimi nuk u mor parasysh për rikthimin e e saj në punë.
“Vendosa ta ndiqja këtë çështje në gjykatë në vitin 2015 dhe e mbrojta e vetme, pa avokat. Gjykata vendosi të më kthente në vendin e punës dhe të më paguante që nga dita e shkëputjes deri në momentin e emërimit. Apelohet nga ministria dhe e fitoj më 14 shkurt 2018 po e vetme, pa avokat. Kisha lidhur një kontratë me përmbarues. Në shtator akoma nuk po merrte drejtim. Nga 25 shkurti i jam drejtuar platformës për bashkëqeverisje dhe pas tre ditësh jam thirrur dhe sqaruar se situata do merrte drejtim shumë shpejt. Sot jam po aty ku doja dhe falë platformës”, ka treguar ajo.
Kryeministri u shpreh se i vinte shumë zor, pasi ishte edhe deputet i Vlorës, duke pranuar përgjegjësinë e qeverisë. Rama premtoi se do të largoheshin nga puna drejtorët përgjegjës, por qytetarja tregoi se ata ishin larguar tashmë.
“Më vjen shumë zor që ka ndodhur kjo gjë se jam deputet i Vlorës, dhe në këtë rast nuk kemi kujt t’ja hedhim fajin dhe përgjegjësia është drejtpërdrejt e Qeverisë. Dhe ti ke jo faj, por vetëm një të metë që nuk e ke bërë më përpara këtë kërkesë se dhe platforma ka kohë që ekziston dhe do e kishe marrë më shpejt përgjigje. Epo mirë kjo tregon që edhe pjesa tjetër që them është e vërtetë, që kur fitojnë viktimat e abuzimit të administratës ndëshkohen xhelatët dhe më vjen shumë mirë që xhelatët e t’u janë larguar”, tha Rama./Opinion.al
