Ditën e sotme Qeveria miratoi paketën Anti KÇK, të njoftuar më herët edhe nga vete kryeministri Edi Rama, në reagimin e bërë pas takimit me ambasadoren amerikane Yuri Kim.
Ndërkohë, ministrja e Drejtësisë, Etilda Gjonaj ka dhënë detaje për gjithë ata që preken nga zbatimi i aktit normativ, që hyn menjëherë në fuqi.
“Akti thelbësor i paketës Anti KCK, është akt normativ që hyn në fuqi menjëherë dhe ka të bëjë me pasurinë e të dënuarve për krim të organizuar, pjesëmarrje në grupe kriminale, terroriste, trafiqe dhe krime të tjera të rënda. Dhe të gjithë ata që ndonëse të akuzuar për kryerje të krimeve të rënda, për shkak të sistemit të kalbur të drejtësisë nuk u dënuan dhe sot lëvizin të lirë. Të gjithë këta të dënuar apo akuzuar, do të duhet të provojnë se banesat, bizneset, tokat, llogaritë bankare, mjetet motorike të tyre apo familjarëve burojnë nga puna dhe jo nga aktiviteti i paligjshëm”- tha ajo./ Opinion.al
