Qeveria i ka kaluar sot në pronësi truallin e Teatrit Kombëtar, Bashkisë së Tiranës.
Vendimi mban datën e sotme dhe është publikuar në Fletoren Zyrtare. Në vendim thuhet se ky kalim është bërë me qëllim ndërtimin e një godine bashkëkohore dhe me standade të Teatrit Kombëtar në konsultim me të gjitha grupet e interesit”.
Beteja për godinën e Teatrit Kombëtar ka përfshirë për më shumë se një viti qeverinë, Bashkinë e Tiranës dhe Aleancën për Mbrojtjen e Teatrit e cila u krijuar për të kundërshtuar vendimin për prishjen e godinës.
Më 26 shkurt të këtij viti Bashkia e Tiranës njoftoi se projekti për ndërtimin e godinës sipas një formule partneritet publik privat kishte dështuar. Sipas Bashkisë së Tiranës arsyet e mos rënies dakord me palën private, që ishte ofruar për ndërtimin e teatrit të ri, lidhen me pamundësinë e kompanisë për ta realizuar projektin në një kohë të shpejtë dhe sipas të gjitha kërkesave teknike të kërkuara nga përfaqësia e artistëve në komisionin e negocimit. Kështu që u vendos që godina e re e teatrit të ndërtohet me fonde publike.
Më 24 Mars, ‘’Europa Nostra” e futi godinën e Teatrit Kombëtar në programin e “7 vendndodhjeve më të rrezikuara”. Mbështetje për këtë nismë deklaroi publikisht edhe Komisionerja e Bashkimit Europian për inovacionin, kërkimin, kulturën, edukimin dhe rininë, Mariya Gabriel.
Lidhur me vendimin e sotëm të qeverisë ka reaguar edhe Partia Demokratike përmes ish-deputetes Jorida Tabaku. Ajo e ka cilësuar këtë një vendim kriminal dhe se pas tij fshihet një projekt kriminal. /Opinion.al
