Qeveria e Katalonias tha të hënën se rezultatet paraprake tregojnë se 90 për qind e votuesve që morën pjesë në referendumin e së dielës, duan që rajoni të shpallë pavarësinë nga Spanja.
Zëdhënësi i qeverisë rajonale, Jordi Turull, tha se 2.02 milionë nga 2.26 milionë votues janë shprehur në favor të pavarësisë.
Presidenti katalonas, Carles Puigdemont, tha më herët se do të shpallë njëanshëm pavarësinë nga Spanja nëse rezultati dëshmon se mbi 50 për qind e votuesve duan të ndahen.
“Ne kemi fituar të drejtën që të kemi shtet në formë të republikës”, tha zoti Puigdemont në një fjalim televiziv pas mbylljes së votimeve.
Qeveria e Spanjës kundërshton me forcë.
Zyrtarët në Katalonia thanë se mbi 800 veta u plagosën gjatë përpjekjeve të policisë për të penguar votimet. Gjykata Kushtetuese e Spanjës pezulloi ligjin e miratuar në parlamentin rajonal për referendumin, por ai u mbajt megjithatë.
