Trazirat në Francë po qetësohen, pas pesë ditësh protesta të dhunshme si kundërpërgjigje për vrasjen e adoleshentit Nahel M nga një efektiv i policisë.
Më shumë se 150 persona u arrestuan të dielën në mbrëmje, krahasuar me më shumë se 700 një natë më parë.
Ditët e fundit ka pasur thirrje të shumta për ndalimin e dhunës, përfshirë edhe nga familja e Nahelit.
Kryetarët e bashkive kanë bërë thirrje që njerëzit të mblidhen jashtë bashkive të hënën për të protestuar kundër dhunës dhe plaçkitjes.
Në një deklaratë për shtyp të shpërndarë të dielën, shoqata e kryetarëve të bashkive të vendit thanë se “Ne refuzojmë ta lëmë vendin tonë t’i nënshtrohet kaosit… Fatkeqësisht, kjo situatë nuk është befasi dhe prej vitesh kryebashkiakët e Francës i kanë rënë kambanës së alarmit për degradimin në shoqërinë tonë”.
Ata gjithashtu i referohen sulmit në shtëpinë e një kryetari bashkie në periferi të Parisit në fundjavë, në të cilin rebelët qëlluan me raketa mbi gruan dhe fëmijët e zyrtarit në arrati. Ngjarja po trajtohet si vrasje e mbetur në tentativë.
Rebelët kanë dëmtuar dhe kanë tentuar të vënë flakën në disa bashki në të gjithë Francën që nga fillimi i trazirave.
Megjithatë, mbrëma e së dielës u vu re një rënie e dukshme e numrit të incidenteve të regjistruara krahasuar me javën e kaluar.
Mbrëmë u dogjën 297 makina krahasuar me 1900 të së enjtes, ndërsa 34 ndërtesa u dëmtuan ose u dogjën në krahasim me më shumë se 500 të enjten.
Ndërsa pritet që të martën, presidenti francez Emmanuel Macron do të takohet me kryetarët e 220 zonave komunale që janë prekur nga dhuna./Opinion.al
