Një fëmijë 6-vjeçar është sulmuar në rrugë nga një qen i racës pitbull, por fatmirësisht ka shpëtuar pa plagë, duke qenë se i ati ka qëlluar me armë në ajër. Ngjarja ka ndodhur pasditen e së dielës në afërsi të spitalit “Shefqet Ndroqi”, i njohur si Sanatoriumi, në Tiranë.
Megjithatë, ky veprim, edhe pse në mbrojtje të të birit, i ka kushtuar vendin e punës 40vjeçarit, i cili është punonjës i një shoqërie të ruajtjes dhe sigurisë fizike. Nga ana tjetër, ndaj tij ka nisur edhe një procedim penal në gjendje të lirë, pasi është denoncuar për prishje të rendit dhe qetësisë publike nga personeli i spitalit.
Burime nga Policia e Tiranës thanë se fillimisht është marrë njoftim në sallën operative për të shtëna me armë pranë Sanatoriumit dhe në vendin e ngjarjes kanë shkuar menjëherë shërbimet e Komisariatit nr.1. Shtetasi me inicialet M.Gj., polic privat, është gjendur në vendin e ngjarjes bashkë me të birin 6 vjeç, A.Gj., dhe ka sqaruar se çfarë kishte ndodhur.
Atij i është marrë deklarim në vendngjarje, duke qenë se ishte bashkë me fëmijën e mitur dhe ka sqaruar situatën se përse ishte detyruar të qëllojë në ajër. Polici ka treguar se sapo ka parkuar makinën pranë spitalit “Shefqet Ndroqi”, dhe kishte zbritur bashkë me djalin për të vizituar një të afërmin e tij, një qen i është vërsulur të birit.
Nga frika se mos e kafshonte, ai ka nxjerrë menjëherë nga brezi armën e shërbimit, një pistoletë tip “TT” dhe ka qëlluar dy herë në ajër, në mënyrë që të trembte qenin dhe të shpëtonte djalin. Sapo ai ka qëlluar, qeni është larguar. Sipas tij, nuk kishte asnjë formë tjetër për ta shpëtuar të birin nga qeni, që sipas tij ishte shumë i egër. Megjithatë, duke qenë se ngjarja ka ndodhur në një ambient publik, për më tepër që të shtënat me armë kanë shqetësuar edhe pacientët e spitalit, veprimi i 40 vjeçarit është denoncuar në Polici. Burimet thanë se efektivit të policisë private i është sekuestruar arma e shërbimit dhe i është bërë e qartë se ndaj tij do të nisë një procedim penal në gjendje të lirë me akuzën e “prishjes së rendit dhe qetësisë publike”./ Panorama.al
