Ndonëse shumë raporte e kanë nxjerrë Shqipërinë si një ndër vendet kryesore të prodhimit të kanabisit në Europë, kohët e fundit vendi ynë është shndërruar edhe në një vend tranzit për heroinën. Qendra Europiane e Drogërave dhe Varësisë (EMCDDA) në një raport për vitin 2017 tregon se Shqipëria po kthehet në një nyje të trafikimit të heroinës dhe se një pjesë e drogave të forta mbetet në vend.
Rrugët kryesore që përdoren janë: Turqi-Bullgari-Maqedoni-Shqipëri dhe Turqi-Bullgari-Maqedoni-Kosovë-Shqipëri. Heroina transportohet në Shqipëri me kamionë, autobusë, makina etj.
Të dhënat e raportit tregojnë se destinacionet kryesore të trafikimit të heroinës nëpërmjet Shqipërisë janë Italia dhe Greqia, por një pjesë e sasisë së trafikuar mbetet në vend për konsumatorët në Shqipëri.
Ky raport vjen pikërisht në kohën kur raportohet se policia italiane ka goditur një grup kriminal ku janë sekuestruar 38 kilogramë marijuanë dhe 7.4 kilogramë heroinë.
Mësohet se droga më vlerë mbi gjysmë milion euro vinte nga Shqipëria dhe do të shpërndahej në Napoli.
Për më tepër: raporti i plote
