Policia e Elbasanit ka arrestuar sot Florenc Capjen dhe dy të tjerë, një ditë pasi qëlluan me armë drejt policisë. Përpos Florenc Capjes prangat i janë vënë Ardjan Çapjes si dhe mikut të tyre, Bledar Muça.
Ngjarja
Rreth orës 20:00 të mbrëmjes së djeshme fisi Capja qëlloi mbi policinë. Ngjarja ka ndodhur në dalje të qytetit, në afërsi të varrezave të dëshmorëve pranë Parkut “Rinia” në Elbasan. Sipas policisë, gjatë një vëzhgimi të një prej grupeve të Policisë së Shtetit, pjestarë të familjes Çapja kanë qëlluar me armë në drejtim të uniformave blu dhe më pas kjo e fundit i është kundërpërgjigjur.
Për shkak të ngjarjes së tre ditëve më parë ku mbeti i plagosur Bledar Muça, policia Elbasan ka rritur kontrollet. Publikimi i një video të regjistruar nga kamerat e sigurisë, së një biznesi privat, tregoi momentin e largimit të autorit të atentatit të së hënës ku mbetën të plagosur dy persona.
Mëngjesin e ditës së hënë, rreth orës 10:00, në një nga zonat më të populluara të Elbasanit, në rrugën “28 Nëntori” një person hapi zjarr me breshëri automatiku ndaj një makine, ku ishin Florenc Çapja dhe Bledar Muça. Plumbat plagosën lehtë Muçën dhe një efektiv policie që ishte duke kaluar aty rastësisht.
