Një 55-vjeçar në Berat është arrestuar nga policia pasi qëlloi me armë zjarri në ajër pas konfliktit me një 25 vjeçar.
Uniformat blu bëjnë me dije se bëhet fjalë për Ilir Mamuranin i cili pas një sherri të ndodhur për motive të dobëta ka qëlluar ndaj shtetasit E. M.
Në pranga ka rënë edhe i riu, Emiliano Zoga i cili u largua nga vendngjarja dhe nuk kallëzoi rrethanat e konfliktit.
Nën hetim është vënë edhe 49 vjeçari Sh.M vëllai i Ilir Mamuranit, pasi në banesë iu gjet një armë gjahu gjysmë-automatike, të cilën e posedonte pa leje që u sekuestrua në cilësinë e provës materiale së bashku me pistoletën e përdorur nga Ilir Mamurani.
Nga kontrollet policore është sekuestruar arma e zjarrit pistoletë me të cilën u qëllua në ajër dhe një armë gjahu gjysmë-automatike.
“Shërbimet e Komisariatit të Policisë Berat, menjëherë pas marrjes së njoftimit se në lagjen “30-vjetori”, ishte qëlluar me armë zjarri në ajër, pas një konflikti midis 2 shtetasve, kanë organizuar punën për zbardhjen e rrethanave të këtij rasti, si dhe për arrestimin e përgjegjësve.
Falë veprimeve të shpejta dhe profesionale procedurale, në kohë rekord, shërbimet e Komisariatit të Policisë Berat, në bashkëpunim me shërbimet e DVP Berat, kanë bërë të mundur kapjen dhe arrestimin e shtetasit I. M., 55 vjeç, banues në Berat, i cili dyshohet se rreth orës 12:00, të datës 09.06.2023, pas një konflikti për motive të dobëta, me shtetasin E. M., ka qëlluar me armë zjarri në ajër.
Gjithashtu, për këtë rast u arrestua edhe shtetasi E. M., 25 vjeç, banues në Berat, sepse pas konfliktit, u largua, dhe nuk dha sqarime për rastin.
Në vijim, u referuan materialet në Prokurori ku nisi procedimi në gjendje të lirë për shtetasin Sh. M., 49 vjeç (vëllai i shtetasit I. M.), pasi gjatë kontrollit në banesë, iu gjet një armë gjahu gjysmë-automatike, të cilën e posedonte pa leje.
Kjo armë gjahu u sekuestrua në cilësinë e provës materiale, së bashku me armën e zjarrit pistoletë me të cilën shtetasi I. M. dyshohet se qëlloi në ajër”, tha policia.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Berat, për veprime të mëtejshme./Opinion.al
