Një 37-vjeçar është ekstraduar nga Franca, pasi ishte shpallur në kërkim ndërkombëtar. Shpëtim Kraja, në vitin 2022 në fshatin Arrameras qëlloi me kallashnikov në drejtim të 2 punonjësve të Policisë të cilët i dhanë urdhër ndalimi, pasi lëvizte me dy persona të tjerë në një automjet të vjedhur në Vlorë.
Po ashtu, 37-vjeçari akuzohet nga Gjykata e Kurbinit dhe për kryerjen e 5 vjedhjeve të tjera.
Gjykata e Kurbinit i ka caktuar masën e sigurisë “Arrest në burg”, për veprat penale “Vrasja e punonjësve të Policisë së Shtetit”, mbetur në tentativë, kryer në bashkëpunim, “Mbajtja pa leje dhe prodhimi i armëve, armëve shpërthyese dhe i municionit”, “Vjedhja”, kryer në bashkëpunim dhe më shumë se një herë, si dhe “Mosbindja ndaj urdhrit të punonjësit të Policisë së rendit publik”.
