Oficerët e policisë po tentojnë të ngrenë lakun rreth 37-vjeçarit shqiptar, i cili qëlloi tre të rinjtë nga Malia në Gazi, shkruajnë mediat greke.
Shqiptari me precedentë të rëndë kriminal vazhdon të fshihet dhe tenton të shmangë policinë, e cila vazhdon të kontrollojë vendet dhe zonat ku ai shkonte muajt e fundit.
Siç raporton Open, 37-vjeçari po përpiqet të gjejë një mënyrë për të shpëtuar nga Greqia dhe për të shkuar në Turqi ose në Maltë. Informatorët e policisë raportojnë se i kërkuari i është drejtuar për ndihmë qarqeve të natës. Megjithatë, deri më tani duket se nuk ia ka dalë, pasi policia mendon se shumë shpejt do ta vërë në gjurmë dhe do ta nxjerrë para drejtësisë.
Shërbimet e policisë në të gjitha zonat në Greqi janë vënë në dijeni, në mënyrë që të jenë vigjilentë në rast të lokalizimit të 38-vjeçarit, i cili konsiderohet veçanërisht i rrezikshëm, pasi ka një precedentë “të rëndë”. Shqiptari 33-vjeçar është tashmë në burg pas rrëfimit të tij.
Mediat greke, shkruajnë se autori 37-vjeçar i të shtënave në Gazi ishte kreu i një bande brutale në Shqipëri, e përfshirë në grabitje me armë të pikave të karburantit, kazinove dhe bankave.
Në vitin 2012, ai u arrestua pas një grabitjeje me armë, gjatë së cilës hapi zjarr me kallashnikov në drejtim të policisë.
Një vit më vonë, ai u dënua me 13 vjet burg. Ai u mbajt në burgjet e Fierit dhe në vitin 2020 u lirua para kohe.
Bëhet e ditur se në vitin 1998, vëllai i tij u ekzekutua nga një bandë rivale dhe që prej asaj kohe 37-vjeçari qarkullonte me identitetin e vëllait të tij të vdekur.
