Nis nga pasditja e sotme, 19 Dhjetor e deri më 5 Janar, policia ka shtuar masat e sigurisë me rastin e festave të fundvitit. Drejtori i Përgjithshëm i rendit dhe sigurisë, Altin Qato i bëri publike ato në mënyrë të detajuar. Ndërsa lidhur me dy grabitjet e ndodhura sot në Tiranë, Fier dhe Korccë, Qato tha se autorët janë identifikuar dhe sëshpejti do tju njoftojmë për arrestimet.
Lidhur me planin e masave ai tha se “të gjitha strukturat e Policisë së Shtetit do kalojnë në shërbim të përforcuar”. Që do të thotë: duke shtuar numrin e patrullave të përgjithshme përgjatë 24 orëve; shtimin e numrit të sporteleve dhe të personelit policor në pikat kufitare; më shumë patrulla të policisë rrugore, si duke patrulluar me Grupe të Forcave të Ndërhyrjes së Shpejtë për të rritur sigurinë në këto akse rrugore; marrjen e masave për mbarëvajtjen e të gjithë aktiviteteve festive që do të zhvillohen nga institucionet e ndryshme shtetërore.
Po kështu policia do të jetë vigjilente edhe ndaj ndonjë aktiviteti të mundshëm kriminal dhe terrorist, apo tendenca të tjera të mprehta kriminale që lidhen me zhvillimin e festave të fundvitit:
-Forcimin e masave për kontrollin ndaj personave me rrezikshmëri të lartë shoqërore me qëllim parandalimin e kryerjes së ndonjë akti të mundshëm kriminal.
– Përforcimin e masave të sigurisë për ruajtjen e objekteve më të rëndësishme shtetërore, publike e private, nënstacionet elektrike apo te depove të ujit pijshëm.
Policia e Shtetit kërkon bashkëpunimin me median dhe publikun në lidhje me:
– Informimin e publikut për masat e Policisë për sigurimin e rendit publik.
– Dhënien e këshillave qytetarëve me qëllim parandalimin e ngjarjeve me pasoja të rënda nga përdorimi pa kriter i fishekzjarrëve, për mënyrën e përdorimit të tyre duke kërkuar mos përdorimin nga të miturit apo përdorimi nën kontrollin e prindërve, etj.
– Kërkimin e ndihmës, bashkëpunimin dhe mirëkuptimin e qytetarëve në rastet e kufizimeve të përkohshme në disa prej akseve rrugore për shkak të zhvillimit të aktiviteteve masive kulturore e fetare.
