Presidenti rus Vladimir Putin i ka thënë liderit turk, Recep Tayyip Erdogan, se Rusia është e gatshme të diskutojë për rikthimin e marrveshjes së grurit nga Deti i Zi.
“Ne kemi shumë për të folur, duke përfshirë sigurimin e sigurisë në rajon,” i tha Putin Erdoganit, në një shkëmbim përpara bisedimeve të tyre në Soçi.
“Ne nuk do ta injorojmë temën e krizës ukrainase. E di që ju keni ndërmend të ngrini pyetje rreth marrëveshjes së grurit, ne jemi të hapur për negociata për këtë çështje,” tha Putin.
Ndërkohë, Erdogan i tha Putinit se bisedimet për korridorin e grurit do të jenë “shumë të rëndësishme”.
“Sot të gjithë po shikojnë çështjen e korridorit të grurit këtu,” tha Erdogan. “Unë besoj se mesazhi në konferencën për shtyp do të jetë një hap shumë i rëndësishëm, veçanërisht për vendet e pazhvilluara në Afrikë.”
Zëdhënësi i Kremlinit Dmitry Peskov thotë se bisedimet midis Putinit dhe Erdoganit kanë qenë konstruktive – por nuk ka plane për të nënshkruar ndonjë dokument për asnjë nga temat e diskutuara, duke përfshirë një marrëveshje gruri.
Peskov tha se bisedimet do të vazhdojnë midis krerëve të shteteve.
Rusia lejoi që marrëveshja e drithërave të Detit të Zi, e ndërmjetësuar nga Kombet e Bashkuara dhe Turqia, të skadojë në korrik. Marrëveshja garantonte kalimin e sigurt të grurit ukrainas nga portet e saj të Detit të Zi.
Që nga tërheqja nga marrëveshja, Rusia ka rifilluar bllokimin e porteve të Ukrainës dhe i ka nënshtruar ato ndaj bombardimeve të rënda, duke synuar objektet e magazinimit dhe infrastrukturën dhe duke shkaktuar frikë për sigurinë globale të ushqimit./Opinion.al
