Paraditen e sotme punonjësit e fasonerisë nga qyteti i Kuçovës kanë protestuar për të dytën ditë radhazi përpara Drejtorisë së Tatim-Taksave Berat.
Shkak për këtë protestë është bërë mos-pagimi i “pagave të luftës” për 159 punonjësit e kësaj ndërmarrjeje që me vendim të qeverisë është mbyllur në datën 9 Prill.
Punonjësit e përshkruan qytetin e Beratit në këmbë, por janë ndaluar nga policia në afërsi të Urës së Varur. Një përfaqësi e punonjësve të këtij biznesi që prodhon çanta në qytetin e Kuçovës kanë protestuar edhe dje përpara Drejtorisë së Tatimeve.
Sipas protestuesve, fasoneria ku ata punojnë gjithë punonjësit janë të siguruar, por deri më tani askush nuk ka marrë “pagën e luftës”. Ata i kërkojnë qeverisë që të marrin pagën e premtuar, ndërsa paralajmërojnë se nëse nuk u kalon “paga e luftës” ata do të përshkallëzojnë protestat e tyre deri në grevë urie./ Opinion.al
