Një punonjës gjerman i muzeut ndërroi një pikturë me një të rreme dhe më pas e shiti origjinalin për të blerë gjëra luksoze, duke përfshirë një Rolls Royce dhe orë dore të shtrenjta.
Sipas mediave të huaja, mësohet se 30-vjeçari, i cili mbetet i paidentifikuar për shkak të ligjeve strikte të privatësisë në Gjermani, u dënua gjithashtu për vjedhjen e tre veprave të tjera të artit. Ai shmangu burgun, por iu dha një dënim me kusht 21 muaj dhe u urdhërua t’i kthente muzeut më shumë se 60,600 euro.
Në një deklaratë për shtyp të botuar të hënën, Gjykata e Qarkut të Mynihut tha se dënimi i saj mori parasysh se autori kishte pranuar fajin dhe kishte thënë se ishte penduar.
Autori, i cili ishte punonjës i Muzeut Deutsches në Mynih, kishte punuar në menaxhimin e koleksionit nga maji 2016 deri në prill të vitit 2018.
Gjatë asaj kohe, ai vodhi “Das Märchen vom Froschkönig” (Përralla e Princit të Bretkosës) nga Franz von Stuck, e zëvendësoi atë me një të rreme dhe e nxori origjinalin në ankand. Ai gënjeu një shtëpi ankandi në Mynih, duke thënë se piktura dikur i përkiste gjyshërve ose stërgjyshërve të tij. Më vonë u shit në një galeri zvicerane për 70,000 euro.
Ai vodhi gjithashtu tre piktura të tjera nga muzeu dhe shiti me sukses dy prej tyre – “Die Weinprüfung” (Testi i verës) nga Eduard von Grützner dhe “Zwei Mädchen beim Holzsammeln im Gebirge” (Dy vajza që mbledhin dru në male) nga Franz von Defregger.
Njëra prej veprave u shit përmes ankandit dhe tjetra u ble direkt nga shtëpia e ankandit, duke i dhënë atij 11,490 euro të tjera.
Ai i përdori paratë për të shlyer borxhet dhe për të bërë një “mënyrë jetese luksoze”, tha gjykata, duke shtuar: “I pandehuri shfrytëzoi paturpësisht mundësinë për të hyrë në dhomat e magazinimit … dhe shiti pasuri të vlefshme kulturore për të siguruar një standard të lartë jetese për veten dhe për t’u dukur.”
Ndërkohë Muzeu Deutsches tha se po bën përpjekje për të rikuperuar pikturat./Opinion.al
