Elton Lala (personi në foto) punonjës i Policisë së Burgjeve u arrestua një ditë më parë për trafik droge, së bashku me bashkëpunëtorin e tij Shklëzen Duçka.
Ata u ndaluan në dalje të Tiranës në një operacion të Policisë së Tiranës. Burime pranë grupit hetimor thanë se lënda narkotike që u gjet në makinën e Elton Lalës ishte marrë në fshatin Shengjergj, mbrapa malit të Dajtit.
Sipas të njëjtave burime mësohet se ky ka qenë implikimi i parë i Lalës në trafikun e lëndëve narkotike. Në rastin në fjalë ai kishte marrë përsipër të luante rolin e korrierit deri në Tiranë. Droga, sipas policisë kishte si destinacion tregun e brendshëm të kryeqytetit.
Burime nga Drejtoria e Burgjeve bënë me dije se menjëherë pas vënies në dijeni për arrestimin është firmosur urdhëri për lirimin e menjehershëm nga detyra të tij.
Punonjësi i shtetit u kap me 8.6 kg kanabis sativa.
Në cilësinë e provës materiale u sekuestrua edhe një pistoletë e shërbimit tip TT, model 56 dy krehër me 14 fishekë, Një automjet i tipit “Mercedes Benz” dhe 4 telefona celularë.
Materialet proceduriale i kaluan Prokurorisë pranë Gjykatës Shkallës Parë Tiranë, për veprën penale të “Prodhim dhe Shitje të narkotikëve”. /Tv Klan
