Policia e Shtetit ka njoftuar kryrjen e një operacioni për evidentimin dhe goditjen e veprimtarisë kriminale në fushën e kultivimit të bimëve narkotike në Gjegjan të Pukës. Sikurse bëhet e ditur në njoftim në këtë operacion ku është përfshirë edhe ndërhyrja me helikopter është bërë i mundur identifikimi i një zone ku ishte kultivuar bimë narkotike e llojit cannabis sativa.
Ndonëse në njoftim bëhet e ditur se në operacion kanë ndërhyrë edhe forcat RENEA dhe FNSH, nuk ka informacion se sa është sipërfaqja e mbjellë apo sa rrënjë të bimës narkotike janë gjetur.
“Në vijim të kontrolleve dhe të goditjeve të njëpasnjëshme ndaj veprimtarisë kriminale në fushën e prodhimit dhe shitjes së narkotikëve, bazuar në informacionet e marra në rrugë operative se në vendin e quajtur “Qafa e Helmit”, në zonën e fshatit Shkozë, Njësia administrative Gjegjan, Pukë, Shkodër, kishte të kultivuara bimë narkotike cannabis sativa dhe fidanë narkotikë në tokë dhe në kubikë, është organizuar operacioni policor i koduar “Qafa e Helmit”.
Pas disa orësh monitorim me helikopter u bë i mundur identifikimi i vendit ku ishin kultivuar bimët narkotike cannabis sativa, një terren malor i thepisur dhe i pyllëzuar, çka ka vënë në vështirësi dhe rrezik jetën e forcave speciale RENEA, të cilët kanë zbritur me litar nën një zonë mes shkurreve për të shkuar ne vendin ku ishin kultivuar bimët narkotike në tokë dhe në kubikë. Nga grupi hetimor vijojnë veprimet e thelluara për identifikimin dhe kapjen e personave të përshirë në këtë veprimtarisë kriminale, si dhe për të vërtetuar nëse ka pasur implikim ose jo nga ana e inspektorëve të Policisë së zonës, pavarësisht terrenit malor të vështirë”, bën me dije policia./Opinion.al
