Mësuesja E.Datja, shoqëruar në policia pasi ishte filmuar duke goditur me litar nxënësit para dërrsasës së zezë, është aktualisht shtatzënë.
Sipas policisë lokale kjo duket se do ta lehtësojë pozitën e saj në raport me akuzën, pas publikimit të videos së dhunës. Po ashtu, të njëjtat burime bëjnë me dije se vepra në fjalë është kryer prej kohësh dhe nuk ka sjellë pasoja. Ngjarja e cila është regjistruar në kamera, mësohet se ka ndodhur në muajin Shtator të vitit të kaluar.
Burime pranë Komisariatit të Policisë Dibër dhe drejtori i shkollës 9 vjeçare “Selim Alliu”, Peshkopi, Mezin Shehu, pohuan për “Panorama” se
pamjet filmike vijnë pas një “loje” që nxënësit kishin organizuar në klasë.
Vetë mësuesja ka treguar në polici të vërtetën sipas saj. Nxënësit e kësaj klase po merren në pyetje për të zbardhur të vërtetën.
Ajo që rëndon pozitat e mësueses janë goditjet me litar të nxënësve në gjymtyrët e poshtme dhe pastaj tentativa për t’ja vënë njërit prej
fëmijëve në qafë, veprim që duket edhe në video.
