Artisti Robert Alia i ftuar në emisionin “Zonë e Lirë” pas debatit të krijuar me fanellën që i dhuroi në spektakël live deputetit Nard Ndoka, ka komentuar qartë domethënien e asaj revolte.
Aliaj e detyroi demokristianin Ndoka të veshë fanellën me simbolin tonë kombëtar, shqiponjën me dy krerë, e ilustruar si kryq i thyer (svastika), në shenjë revolte ndaj kësaj gjendje mjerane që është krijuar në vendin tonë.
Pikërisht kjo revoltë artistike e artistit Alia nuk kaloi pa tension në rrjetet sociale.
Ai tha në “Zonë e Lirë”, se kjo vepër artistike, nuk nënkupton krahasimin e simbolit tonë kombëtar me kryqin e thyer, por përtej kësaj, është Shqipëria e ‘gjymtuar’ apo e copëtuar.
“Kjo shqiponjë është bërë shumë kohë më parë dhe është ekspozuar në Belgjikë. E shoqëruar me simbole të tjera shtetesh europiane, nuk ka bërë ndonjë skandal, por kanë përmbajtur një mesazh të fortë”.
Mirëpo, drejtuesi i emisionit ‘Zonë e Lirë’ në TV Klan, Arian Çani ka bërë me dije se video e çastit kur Robert Alia i dhuroi bluzën me shqiponjën e ‘thyer’ live në “Dance Ëeth Me” deputeti Ndoka është fshirë nga rrjeti YouTube.
Opinion.al, publikon pikërisht momentin e revoltës së artistit Robert Alia, ku ai i dhuron këtë fanellë deputetit demokristian, në shenjë revolte ndaj kësaj gjendje që është krijuar përgjatë këtyre dy dekadave nga politika dhe politikanët tanë.
