Trajneri i përfaqësueses shqiptare, Kristian Panuçi, ka bërë publike listën e futbollistëve të grumbulluar për dy ndeshjet e kuqezinjve në eliminatoret e Rusi 2018, kundër Spanjës dhe Italisë. Duke marrë për bazë situatën e pezullimeve me Roshin, Mavrajn e Kukelin që mungojnë për sfidën e parë, Panuçi ka përpiluar një listë me 26 emra për këtë grumbullim.
Trajneri ka konfirmuar treshen Ahmedi-Memolla-Balliu, të cilëve u shtohet si debutues edhe Emanuele Ndoji i Breshias. Ndërkaq, në Kombëtare kthehen edhe emrat e njohur si Xhaka, Kaçe e Lenjani, të cilët ishin lënë jashtë një muaj më pare nga tekniku i kuqezinjve.
Në përfaqësuese kthehet edhe Sokol Cikalleshi, sinjal i qartë i trajnerit se problemi i një muaji më parë tashmë i përket të kaluarës dhe se sulmuesi do të jetë në dispozicion të ekipit. Në krahasim me listën e shtatorit, jashtë ekipit ka mbetur Jahmir Hyka, i cili nuk po luan rregullisht as në SHBA dhe me sa duket nuk bind trajnerin sa u përket dy ndeshjeve të radhës. Jashtë mbetet edhe Bekim Balaj, ndonëse është kthyer javën e kaluar në fushën e lojës duke lënë pas dëmtimin që kishte pësuar.
