Mësuesi 64 vjeçar i shkollës 9-vjeçare “Mustafa Lleshi”, në Kashar të Tiranës i arrestuar pas denoncimit për ngacmim seksual të një nxënëseje të klasës së shtatë ka thënë në polici se nxënësja mund të jetë keqkuptuar.
Martani ishte mësuesi kujdestar i vajzës 14-vjeçare J.H., ndërsa në këtë shkollë jepte mësim prej 9 vitesh. Burime nga Policia e Tiranës thanë dje se Hasan Martani është arrestuar mesditën e së martës në ambientet e shkollës, me akuzën e kryerjes së veprave të turpshme me të mitur.
Burimet thanë se përveç kallëzimit që i është marrë 14-vjeçares, prindërit e saj kanë dorëzuar si provë edhe disa mesazhe që ai i kishte dërguar vajzës në rrjetin social Facebook. Pavarësisht padisë dhe provave të paraqitura në polici nga pala tjetër, gjatë deklarimeve që ka dhënë në Komisariatin nr.6, mësuesi 64-vjeçar ka mohuar akuzën.
Ai është shprehur se vajza mund ta ketë keqkuptuar në ndonjë veprim apo afrimitet që mund të ketë treguar me të, për shkak se ajo ishte nxënëse e mirë. Por sipas tij nuk ka ndodhur asgjë më shumë dhe veprime të tilla nuk i ka kryer asnjëherë gjatë karrierës së tij, raporton “Panorama”.
Dy punonjës Policie të Komisariatit nr.6 janë futur brenda në shkollë dhe pasi kanë pyetur fillimisht drejtoreshën për prezencën e tij në shkollë apo jo, dhe i kanë sqaruar arsyen pse ndodheshin aty, kanë thirrur mësuesin Martani që të dilte nga klasa.
Për të shmangur prangosjen e tij në prezencë të nxënësve që po u jepte mësim, oficerët e Policisë i kanë kërkuar mësuesit që të dilte me ta në oborrin e shkollës dhe më pas i kanë bërë të ditur arsyet e arrestimit të tij.
Në përballjen e parë me punonjësit e Policisë, 64-vjeçari ka shprehur habi për akuzën e ngritur ndaj tij dhe për shoqërimin, duke mohuar që në momentin e parë të kishte kryer një veprim të tillë.
