Ish-futbollisti i Barcelonës e Interit të tripletës, aktualisht Presidenti i Federatës së Futbollit të Kamerunit, Samuel Eto’o, akuzohet për trukime.
Një media vendase në Kamerun ka publikuar përgjimet e telefonit të Samuel Eto’o, në të cilat ai duket të ketë ndikuar në ngjitjen e një ekipi vendas në elitën e futbollit të shtetit afrikan. “Mos u shqetëso, do t’iu ngjisim në kategorinë e parë. Ekipi do të ngjitet në ligën e parë, ky është qëllimi”, kjo është fjalia e publikuar nga media vendase, e cila pretendohet t’i jetë thënë presidentit të ekipit të ligës së dytë nga Samuel Eto’o.
Megjithatë, ish-sulmuesi i Interit ka reaguar duke thënë se këtë mesazh ia kishte dërguar një mikut të tij. “Po flisja me një mik, dikush që investon në futboll dhe dëshiron që ta bëjë klubin e tij një nga më të mirët në Kamerun”.
Përgjimet janë kryer në muajin janar, kur në atë kohë skuadra Victoria Limbé ishte në garë për t’u ngjitur në elitën e futbollit vendas, objektiv të cilin e arriti më pas.
