Media greke ka publikuar fotot e shqiptarëve që u arratisën nga ambientet e Drejtorisë së Paraburgimit në Athinë, mesnatën e së mërkurës.
Tre shqiptarët raportohet se prenë hekurat e dritares në katin e dytë të qendrës së paraburgimit dhe duke përdorur çarçafët si litarë zbritën nga një lartësi prej rreth 7 metrash. Një arratisje e denjë për skenaret e filmave aksion, shkruan e përditshmja greke “Protothema”.
Liria për një nga tre shqiptarët e arratisur teksa ishin në pritje të vendimit të gjykatës zgjati vetëm pak orë. Shqiptari i kapur është një 35-vjeçar, identiteti i të cilit nuk bëhet i ditur. Ai ishte i proceduar për trafik droge. Dy të tjerët, 27 dhe 38 vjeç, akuzohen gjithashtu për trafik droge dhe vrasje.
“Zougla.gr” raporton se tre shqiptarët e arratisur kanë inicialet M.F., Z.A. dhe B.K. por nuk bën të ditur se cili prej tyre është arrestuar.
Policia greke ka zgjeruar rrezen e kërkimeve edhe jashtë Athinës, pasi koha e kaluar u ka lejuar shqiptarëve të arratisur të veprojnë sipas planeve. Autoritetet në vendin fqinj nuk përjashtojnë mundësia e ndihmës nga jashtë.
Në tentativë për t’u arratisur ishte edhe një gjeorgjian, i cili u kap në momentin e fundit nga rojet e sigurisë.
Tv Klan
