Policia ka bërë të mundur identifikimin e personit të dyshuar si autor të vrasjes së reperit të famshëm amerikan, Nipsey Hussle.
Ai është 29-vjeçari Eric Holder, i cili mendohet se është larguar nga vendi i ngjarjes me një makinë “Chevy Cruze”.
Ndërkohë, janë publikuar edhe pamjet e vrasjes së reperit në mes të ditës. Nga pamjet duket se autori i afrohet viktimës, i cili ishte nën shoqërinë edhe të disa personave të tjerë, dhe gjakftohtë e qëllon atë disa herë në kokë dhe në trup dhe largohet me shpejtësi nga vendi i ngjarjes. Reperi u dërgua me urgjencë në spital, por nuk mundi t’u mbijetonte plagëve të marra.
Kujtojmë se reperi amerikan Nipsey Hussle është vrarë ditën e dielë me armë zjarri jashtë dyqanit të tij të veshjeve në Los Angeles, SHBA. Gjithashtu gjatë të shtënave janë plagosur edhe dy persona të tjerë që ishin bashkë me të.
Emri i vërtetë i Nipsey Hussle ishte Davidson Asghedom dhe ishte 33 vjeç. Në moshën e adoleshencës ka qenë pjesë e një bande në Los Angeles. Në vitin 2018, albumi i tij “Victory Lap” u nominua si albumi më i mirë i këngës rep në çmimet Grammy, ndërsa në mesazhin e tij të fundit në Twitter shkruante: “Të kesh armiq të fortë është një bekim.”
Për ngjarjen reaguan edhe shumë personazhe të njohur, mes të cilëve edhe Rihanna. “Shpirti im është dridhur nga ky lajm”, shkroi në Twitter këngëtarja./Opinion.al
