Intervista e së enjtes e kryeministrit, Edi Rama duket se ka mërzitur Athinën. Një burim diplomatik nga Ministria e Jashtme greke ka folur për mediat helene duke thënë se Athina nuk ka ndërmend të negociojë me Shqipërinë për çështjen e kufijve. Reagimi sipas agjencisë së lajmeve ANA-MPA, ka ardhur pas deklaratës së kryeministrit shqiptar Edi Rama, se Tirana dhe Athina po bisedojnë lidhur me këtë çështje.
“Nuk ka asnjë diskutim mes 2 vendeve për kufijtë, pasi ata janë përcaktuar në bazë të marrëveshjeve ndërkombëtare, të cilat janë të panegociueshme”, ka deklaruar një burim nga Ministria e Jashtme greke për mediat.
Zyrtari në fjalë ka nënvizuar se në Traktatin e Miqësisë dhe bashkëpunimit që është nënshkruar në Tiranë më 21 mars 1996 parashikohet që të dy shtetet të respektojnë kufijtë ekzistues, të cilët janë të pacënueshëm. Ditën e enjte, në një intervistë televizive, Kryeministri Rama deklaroi se me Greqinë po diskutohet për kufirin detar, por kjo deklaratë duket se është interpretuar ndryshe nga mediat greke.
